हत्या आरोपमा मकवानपुरगढीका एक जना पक्राउ
मकवानपुर । हत्या आरोपमा फरार रहेका मकवानपुरको मकवानपुरगढी गाउँपालिकाका एक युवक पक्राउ परेका छन् ।
ललितपुरको बालकुमारीमा डेरा गरी बस्ने उदयपुर कटारी नगरपालिका–२ गुराँस गाउँ घर भएका ३३ वर्षीय हरी खड्काको हत्यामा संलग्न रही फरार रहेका अभियोगमा मकवानपुरगढी गाउँपालिका–१ पिङडाँडा बस्ने २३ वर्षीय बुद्ध बोम्जनलाई प्रहरीले पक्राउ गरेको हो ।
ललितपुर महानगरपालिका–९ गुहे पोखरीमा वि.सं. २०७६ साउन २८ गते हरीलाई बोम्जनसहितको समूहले धारिलो हतियार प्रहार गरी हत्या गरी फरार भएको प्रहरी प्रधान कार्यालयले जनाएको छ ।.काठमाडौं उपत्यका अपराध अनुसन्धान कार्यालय मिनभवनबाट खटिएको प्रहरीले घटनामा संलग्न बोम्जनलाई पक्राउ गरेको हो ।
उनलाई आवश्यक कारवाहीको लागि जिल्ला प्रहरी परिसर ललितपुर पठाइएको छ ।
