पदमपोखरी बहुमुखी क्याम्पसको अध्यक्षमा सोविन थिङ चयन
मकवानपुर । मकवानपुरको हेटौँडा उपमहानगरपालिका वडा नम्बर १३ पदमपोखरीस्थित पदमपोखरी बहुमुखी क्याम्पस व्यवस्थापन समितिको अध्यक्षमा सोविन थिङ चयन भएका छन् ।
शनिबार भएको दोस्रो क्याम्पस सभाले थिङलाई सर्वसम्मत अध्यक्ष चयन गरेको हो । उनको कार्यकालमा क्याम्पसको शैक्षिक स्तर अझै वृद्धि हुने अपेक्षा अभिभावक र विद्यार्थीहरुले गरेका छन् । थिङ लामो समयदेखि सामाजिक कार्यका साथै राजनीतिक क्षेत्रमा पनि सक्रिय छन् ।
वि.सं. २०७१ सालमा स्थापित क्याम्पसमा हेटौँडा उपमहानगरपालिका वडा नम्बर १३ पदमपोखरी, वनस्पति, ठूलोथली, टुटेपानीका साथै वडा नम्बर १२ को सिग्रेनी, पान्तले, हात्तिगौँडा, घरेडी डाँडा, बेलडाँडा, भोर्ले लगायतका स्थानबाट विद्यार्थीहरु अध्ययनका लागि आउने गर्छन् ।
क्याम्पसमा हेटौँडा बजार आसपासका क्षेत्रका साथै मनहरी गाउँपालिका वडा नम्बर १ र २ का क्षेत्रबाट पनि विद्यार्थीहरु अध्ययनका लागि आउने गरेका छन् ।
