४ नम्बर वडाले जित्यो हेटौँडा मेयर कपको उपाधि
मकवानपुर । हेटौँडा मेयर कप फुटबल प्रतियोगिताको उपाधि ४ नम्बर वडाले जितेको छ । बुधबार हेटौँडा–५ स्थित पिप्ले–क्याम्पा रंगशालामा भएको फाइनल खेलमा १४ नम्बर वडालाई टाइब्रेकरमा ६–५ गोलअन्तरले हराउँदै ४ नम्बर वडाले उपाधि हात पारेको हो ।
निर्धारित समयमा १–१ गोल मात्रै भएपछि खेल टाइब्रेकरमा धकेलिएको थियो । टाइब्रेकरमा पनि बराबरीमा भएपछि नतिजाको लागि सडन डेथको साहारा लिइएको थियो । प्रतियोगिताको उपाधि विजेता वडा नम्बर ४ ले १ लाख रुपैयाँ र उपविजेता वडा नम्बर १४ ले १ लाख ५० हजार रुपैयाँसहित शिल्ड, मेडल तथा प्रमाणपत्र प्राप्त गरेका गरेको छ ।
खेलमा तृतीय हुने १५ नम्बर वडाले ५० हजार रुपैयाँ र चौथो हुने १३ नम्बर वडाले २५ हजार रुपैयाँसहित प्रमाणपत्र प्राप्त गरेका छन् । प्रतियोगिताको सर्वोकृष्ट खेलाडी वडा नम्बर ४ का अनिश महर्जन भएका छन् । उनले १० हजार रुपैयाँ प्राप्त गरेका छन् ।
प्रतियोगिताको उत्कृष्ट गोलरक्षक निरज देउला, उत्कृष्ट डिफेन्डर १४ नम्बर वडाका सुविन घलान, उत्कृष्ट मिडफिल्डर १४ नम्बर वडाकै दिपेश भण्डारी र उत्कृष्ट फरवार्ड ४ नम्बर वडाका अनुप राना मगर घोषित भएका छन् ।
