आईपीएलमा पञ्जाबको दोस्रो जित, बेङ्गलोर ८ विकेटले पराजित
काठमाडौं। कप्तान केएल राहुल र क्रिस गेलको शानदार ब्याटिङ प्रेरित किङ्ग्स इलेभने पञ्जाबले इन्डियन प्रिमियर लिग (आईपीएल)मा रोयल च्यालेन्जर्स बेङ्गलोरलाई ८ विकेटले पराजित गरेको छ।
पञ्जाबका लागि ओपनिङमा आएका कप्तान राहुलले अविजित ६१ रनको अर्धशतकीय इनिङ खेले।
शारजाह क्रिकेट रंगशालामा कप्तान विराट कोहलीले ब्याटिङ गर्ने निर्णय गरेपछि क्रिजमा उत्रिएको बेङ्गलोरले निर्धारित २० ओभरमा ६ विकेट गुमाएर १७१ रन बनाएको थियो।
बेङ्गलोरका लागि कप्तान कोहलीले सर्वाधिक ४८, क्रिस मोरिसले २५ र शिवम डुबेले २३ रनको योगदान गरेका थिए।
पञ्जाबका लागि मुरुगान आश्विन र मोहम्मद शामीले २/२ विकेट लिए।
१७२ रनको विजय लक्ष्यसहित जवाफी ब्याटिङमा उत्रिएको पञ्जाबका लागि ओपनरद्वय राहुलले ४९ बलमा १ चौका र ५ छक्कासहित ६१ रनको अविजित इनिङ खेल्दा मयङ्क अग्रवाल २५ बलमा ४ चौका र ३ छक्कासहित ४५ रन बनाएर पेभेलियन फर्के।
विस्फोटक ब्याट्सम्यान क्रिस गेलले ४५ बलमा १ चौका र ५ छक्कासहित ५३ रनको आक्रमक इनिङ खेले।
जितका लागि १ बलमा १ रन आवश्यक हुँदा क्रिजमा उत्रिएका निकोलस पुरनले अन्तिम बलमा छक्का प्रहार गर्दै पञ्जाबको जित सुनिश्चित गरे।
जितसँगै ८ खेलबाट ४ अंक जोडेको पञ्जाब तालिकाको पुछारमा छ भने बेङ्गलोर समान खेलबाट १० अंकसहित तालिकाको तेस्रो स्थानमा छ।
यो खबर हामीले देखापढी डटकमबाट साभार गरेका हौं ।
