मनहरीमा बिहानै गैँडाको आक्रमण, एक जना घाईते
मकवानपुर । मकवानपुरको मनहरी गाउँपालिकामा गैंडाको आक्रमणबाट एक युवक घाइते भएका छन् । गैँडाको आक्रमणमा परी मनहरी गाउँपालिका वडा नम्बर ७ का ३२ वर्षीय रमेश वोटे घाईते भएका हुन् ।
आक्रमणबाट वोटेको ढाड र अनुहारमा चोट लागेको छ । सोमबार बिहान करिब ६ बजेर ४५ मिनेटको समयमा आफ्नै खेतमा पानी लगाउन गएका वोटेलाई गैंडाले आक्रमण गरी घाइते बनाएको जिल्ला प्रहरी कार्यालय मकवानपुरले पुष्टि गरेको छ ।
घाइते वोटेलाई मनहरी अस्पतालमा सामान्य उपचारपश्चात थप उपचारका लागि चितवनको भरतपुर अस्पतालमा रिफर गरिएको प्रहरीले जनाएको छ ।
