हेटौँडामा ३ दिने कला महोत्सव हुने
मकवानपुर । मकवानपुरको हेटौँडामा ३ दिने कला महोत्सव हुने भएको छ । सटर्डे प्लेनएअरको आयोजनामा आगामी जेठ ३ देखि ५ गतेसम्म कला महोत्सव हुन लागेको हो । यसबारेमा शुक्रबार पत्रकार सम्मेलनमार्फत जानकारी दिइएको छ ।
हेटौँडाको सिद्धार्थ हलमा चित्रकला प्रदर्शनी तथा भुटनदेवी मन्दिर, पुष्पलाल पार्क, सहिद स्मारक पार्कमा चित्रकला कार्यशाला हुनेछ । ३ दिन चल्ने कला महोत्सवमा चित्रकला प्रर्दशनी, कार्यपत्र प्रस्तुति, प्रत्यक्ष चित्रकला सिर्जना, खुला चित्रकला कार्यशाला, कला संवाद लगायतकाको कार्यक्रम हुनेछ ।
नेपाल ललितकला प्रज्ञा प्रतिष्ठानको सहकार्यमा पर्यटन प्रवद्र्धन र कला जागरणका लागि कला महोत्सव हुन लागेको हो । महोत्सवबाट उठेको रकमको ५० प्रतिशत मानव सेवा आश्रममलाई सहयोग गरिने कला व्यवस्थापक दिवेशमान प्रधानले जानकारी दिए ।
करिब ५० जना कलाकारको सहभागितामा हुने कला महोत्सवमा इतिहास र संस्कृतिविदहरुको पनि सहभागिता रहने आयोजकले जनाएको छ । हेटौँडा उपमहानगरपालिकाको प्रमुख ऐतिहासिक, सांस्कृतिक तथा पुरातात्विक सम्पदाको प्राचिनता, मौलिकता र जीवन्तता कायम रहनेगरी ललितकलाको माध्यमबाट तिनको संरक्षण र प्रवर्धनमा टेवा पुयाउने आयोजकले दाबी गरेका छन् ।
