उद्योग उपाध्यक्षमा रविन्द्रको उम्मेदवारी घोषणा
मकवानपुर । मकवानपुर उद्योग वाणिज्य संघको यही पुस २४ गतेदेखि २७ गतेसम्म हुने निर्वाचनमा उद्योग तर्फको उपाध्यक्ष पदमा रविन्द्र घिमिरेले उम्मेदवारी घोषणा गरेका छन् ।
शुक्रबार हेटौंडामा पत्रकार सम्मेलन गर्दै घिमिरेले संघमा अध्यक्षका उम्मेद्वार अनिल अग्रवालको प्यानलबाट उद्योग तर्फको उपाध्यक्ष पदमा उम्मेद्वारी रहने बताएका हुन् ।
घिमिरे हाल हेटौंडा उपमहानगरपालिकाको नगर खेलकुद विकास समिति अध्यक्षसमेत छन् । उनी २०५२ सालदेखि सरल निर्माण सेवाबाट व्यवसायिक क्षेत्रमा सक्रिय छन् । उनले हेटौंडाको बुद्घचोकमा तयारी पोशाकको कपडा पसल साई कलेक्शन पनि सञ्चालन गरिरहेका छन् ।
घिमिरेले उम्मेदवारी छोड्छ भन्ने हल्ला फिजाइएकोले भ्रम चिर्न पत्रकार सम्मेलन गरेर जानकारी गराइएको बताए ।
विगतमा पनि थोरै मतान्तरले उपाध्यक्षमा पराजित भएकोले यसवर्ष व्यवसायीहरूको हक हितमा लाग्नका लागि पुनः उम्मेदवारी दिएको उनको भनाई छ । विगतमा पराजित भएपनि आफू व्यवसायीहरुकै माझमा रही उनीहरुको हकहितका पक्षमा लागिपरेको र जितपछि पनि व्यवसायीकै समस्या समाधान र उनीहरूको अधिकार स्थापित गराउन सक्रिय भएर लाग्ने घिमिरेले बताए ।
उद्योग तर्फबाट दिपक शिवाकोटी, राजकुमार बानियाँ, कृष्णगोपाल महर्जन, महिला सदस्यमा मेनका श्रेष्ठ उम्मेद्वार रहेका छन् । प्यानलसहितको संयुक्त उम्मेद्वारी घोषणा भने यही पुस २२ गते हुने बताइएको छ ।
