ठगीको आरोपमा तीन युवक पक्राउ
विदुर–ठगीको आरोपमा नुवाकोटको ककनीवाट तीन जना युवक पक्राउ परेका छन् । अदालतवाट प्रहरीले हिरासतमा राखेर अनुसन्धान गर्ने म्याद पाएको छ ।
नुवाकोटको बिदुर नगरपालिका वट्टारस्थित सविन अमात्यको एसएस गहना पसलमा पहेलो रङ्गको सुनजस्तो देखिने धातु दिई नगद ६० लाख रुपैया ठगी गरी नम्वर नखुलेको हरियो रङ्गको बजाज मोटरसाइकलमा भागी फरार भएकोमा जिल्ला प्रहरी कार्यालय नुवाकोट मातहत प्रहरी चौकी ककनी, रानीपौवाबाट खटिएको प्रहरी टोलीले सवारी साधन चेकजाँच गर्ने क्रममा रातीको समयमा उनीहरुलाई ककनीवाट पक्राउ गरिएको प्रहरी उपरिक्षक दुर्गाराज रेग्मीले जानकारी दिए । उनका अनुसार ककनी गाउँपालिका ५ मा रहेको एक रिसोर्टमा आशंकित व्यक्तिहरुलाई फेला पारी खानतलासी गर्दा उनीहरुको साथबाट नगद ६० लाख रुपैया, २ थान खुकुरी र सो कार्यमा प्रयोग भएको मोटरसाईकल दुई थान फेला परेको हुँदा बरामद गरी उनीहरुलाई पक्राउ गरी अदालतमा पेस गरिएको हो ।
यसरी पक्राउ परेकाहरुमा रसुवाको गोसाईकुण्ड गापा ६ धुन्चेका ३६ वर्षिय जीतमान तामाङ, सोही स्थानका २१ वर्षिय बुद्वराम तामाङ र रसुवाकै आमाछेदिङ्मो गापा १ हाकुका ३० वर्षिय ङवाङदोर्जे तामाङ रहेको एसपि रेग्मीले वताए । पक्राउ परेका तीनै जना युवकहरुलाई ठगी सम्बन्धि कसूरमा नुवाकोट जिल्ला अदालतबाट सात दिनको हिरासतमा राख्ने म्याद थप गरी अनुसन्धान कार्य भई रहेको छ ।
