बारमा कांग्रेस एमाले गठवन्धन विजयी
विदुर–नेपाल बार एसोसिएसनको नयां कार्यसमिति चयन भएको छ । अधिवेसनले सत्तारुढ गठवन्धन पक्षधर समूह विजयी भएको छ ।
अधिवेसन अन्र्तगत भएको मतदानले अध्यक्षमा वरिष्ठ अधिवक्ता प्राडा विजयप्रसाद मिश्रलाई निर्वाचित गरेको छ । सार्वजनिक मतपरिणामअनुसार मिश्र दुई हजार ४३१ मतान्तरले विजयी भएका हुन् ।
प्रा डा मिश्रले पाँच हजार ५२ मत प्राप्त गरे भने अध्यक्षका अर्का प्रत्यासी वरिष्ठ अधिवक्ता रमणकुमार श्रेष्ठले दुई हजार ६२१ मत प्राप्त गरे । नयाँ नेतृत्वका लागि बृहत् लोकतान्त्रिक, प्रगतिशील, पेसागत, राष्ट्रवादी एवं समावेशी कानुन व्यवसायी समूहबाट वरिष्ठ अधिवक्ता प्रा डा मिश्रको समूह र व्यावसायिक कानुन व्यवसायी समूहबाट वरिष्ठ अधिवक्ता श्रेष्ठको समूहबीच प्रतिस्पर्धा भएको थियोे ।
उपाध्यक्षहरूमा कोशी प्रदेशमा पदमप्रसाद लिम्बू, मधेस प्रदेशमा अजय शङ्कर झा, बागमतीमा तेजबहादुर रावल, गण्डकीमा भूपेन्द्र खनाल, लुम्बिनीमा कृष्णप्रसाद पोखरेल, कर्णालीमा विवशकुमार बस्नेत, सुदूरपश्चिममा सिद्धराज ओझा, खुला महिलातर्फ सरस्वती श्रेष्ठ विजयी भएको नेपाल बार एसोसिएसन निर्वाचन २०८१ का प्रमुख निर्वाचन अधिकृत वरिष्ठ अधिवक्ता रामकृष्ण निरालाले जानकारी दिए । उनका अनुसार महासचिवमा वरिष्ठ अधिवक्ता केदारप्रसाद कोइरालाले चार हजार ८७४ मत प्राप्त गरी विजयी हुँदा यज्ञमणि न्यौपानेले दुई हजार ३६७ मत प्राप्त गरे ।
कोषाध्यक्षमा जगतबहादुर कार्की निर्वाचित भए । सदस्यहरूमा चिरञ्जीवी तिलक्यानी (दलित), सूर्यकुमार यादव (मधेसी मुस्लिम काठमाडौँ उपत्यका बाहिर), रिङ्कुकुमारी यादव (मधेसी मुस्लिम खुला), राजकुमार श्रेष्ठ(आदिवासी जनजाति काठमाडौँ उपत्यका बाहिर), मङ्गलसुन्दर शिल्पकार (आदिवासी जनजाति खुला) इन्दिरा आचार्य (महिला काठमाडौँ उपत्यका बाहिर), किरण पौडेल (काठमाडौँ उपत्यका बाहिर) र रञ्जिता कार्की(महिला खुल्ला) विजयी भए ।
बारको नयाँ कार्यसमितिको खुला सदस्यहरूमा किरण न्यौपाने, शारदा गुरुङ, दमनबहादुर चन्द, बाबुराम अर्याल, डा मुकुन्द अधिकारी र माधव मैनाली विजयी भए ।
बारको नयाँ कार्यसमिति चयन गर्न नौ हजार ९ सय ९७ मतदाता रहेकामा सात हजार ९९५ मत खसेको थियो । कुल २५ जना रहने कार्यसमितिका लागि ५७ जनाको उम्मेदवारी परेको थियो ।
