सहिद स्मृति फुटबलमा पुलिस क्लब र च्यासल युथ भिड्दै
मकवानपुर। मकवानपुरको हेटौंडामा जारी दोस्रो संस्करणको भुगर्भ सहिद स्मृति राष्ट्रिय फुटबल प्रतियोगिताको आजको खेलमा नेपाल पुलिस क्लब र च्यासल युथ क्लब काठमाडौंका बिचमा खेल हुदैछ । सिजनको पहिलो तथा सर्वाधिक नगद राशी भएको खप्तड गोल्डकपको विजेता पुलिस र च्यासल युथ हेटौंडामा जारी प्रतियोगिताको पहिलो खेल खेल्न लागेका हुन् । पुलिस र च्यासल दुवै सशक्त एवम् बलियो टोली हो । पुलिसका केही खेलाडी सिनियर तथा युथ–२३ को राष्ट्रिय टोलीमा रहेको कारण पुलिसले नयाँ खेलाडीलाई मौका दिने निश्चित छ । हेटौंडा-१० स्थित वनविज्ञन खेल मैदानमा जारी प्रतियोगिता दिउशो ३ बजेपछि सुरु हुने आयोजकले जानकारी दिएको छ ।
नेपालका सफल एवम् अनुभवी प्रशिक्षक राजु शाक्यको प्रशिक्षणमा रहेको च्यासल युथमा अधिकांश खेलाडी नेपाली फुटबलमा उदियमान खेलाडीहरु रहेका छन् ।
प्रतियोगितामा दश टोलीको सहभागिता रहेको छ । जिल्ला फुटबल संघ मकवानपुरको आयोजनामा भएको प्रतियोगिताको विजेताले नगद आठलाख रुपियाँ र उपविजेताले नगद चारलाख रुपियाँ प्राप्त गर्नेछ । प्रतियोगिताको फाइनल चैत १६ गते शनिबार हुनेछ ।
